الإشهار......... 2m تفرقنا ^^

ها واحد السلام عليكم ورحمة الله لي مبغاش يردها هانية ( حسابو عند الله)

أنا جيت ( على رجلي) نشكي لكم على واحد الحاجة سميتها "إشهار "

( طبعاً غا تقوللي سيري بعدينا قهرتونا بالشكايات "لأ أنا هنا جالسة" ) طبعاً كلكم كتعرفو الإشهار هداك ليكيجبو فيه بنات قرطساااااات وولاد مديرييينش ، قاليك الهدف ديالو هو الترويج للسلعة والتأثير في المستهلك مكدبوش فيها الواحد غير تيشوف قرطاسة واقفة معوجة لابسة ( وقيلة ملابساش أنا لي مكنشوفش) تتقولك أنا استعمل شبهنارالوف( كنتحداكم تقراو هاد الكلمة) تيمشي بلا مايعرف شنو هاد لعجب يشريه ،

زيد على هاد الشي الكثرة ديالهم ( ديال الاشهارات ماشي لبنات) ، وناري بش يروجو لزيت تيديرو لها 19 الاشهار بش لا منفعش ألاول ينفع الخامس (الإحتياط واجب) ، تيديرو فيه واحد الموديل مديراش تطيب وهي تلقاها معرفاش المعنى ديال كوزينة( عيقت ياكو المهم متتعرفش تطبخ )

تيجبو المغنين يغنيو ها سميرة حزين ها الداودي ها الشيخة الحمداوية( ما عرفت واش ماتت أولى باقة حية ) هذا غير نوع واحد ، المصيبة هي كثرة الأنواع تتلقى غير السميات تيطايرو ، الواحد يتلفوا ليه حتى اش يشري لفضيحة الكحلة كون غا كان كل نوع بإمتيازات خاصة نقولوا كيان تعدد اختيارات وراه كلشي كيف كيف ، الحكمة غير في اللون ديال لغلاف ممتشبهش ، مثلاً الصابون ديال لغسل كلشي فعال ، إقتصادي، مطهر، وبريحة الحامض ، وكارثة هادي الواحد صراحة تيحير واش ياخد لي فيه حامضة في الوسط أولى لي فيه حامضة في الجنب

كل هاد الشي تيقديو على الواحد فش يكون ناوي يتفرج شي فيلم مستنيه شهر بش يديروه ، جميع المرافق الصحية تيحطها حداه غير باش يتفرج على خاطروا

يبدا الفيلم قبل مايشوف البطل " فاصل إعلاني ونعود " الفاصل تبارك الله فيه ساعة قل ربع ، تيرجع الفلم تلقى راسك ناسي البدية، فالنهايه ديال الفيلم من بعد ما تكون ركبات فيك الهستيريا ( شخصيا قليل فاش تنوصل للنهاية ديماً تنعس وسط الإشهار الأول أولى الثاني ) تطبق تسول راسك شنا هي الفكرة الأساسية واش دانون بنكهة الدلاح الجديد أولى حفاظات الدراري القابلة للشفط ( بلا مندويو على شي اشهارات ) وكينين شي اشهارات بحد ذاتهم تيفقسو نظراً لغبائهم

كنت غا نعطيكم شي أمثلة وحشمت

صراحة كثروا علينا بالإشهارات ألي معظمها غبية الصنع

ولكن الجودة الحقيقية ديال المنتوج تتبقى غير كلام فكلام من هاد المنب

تنطالب باشهار واقعي ( فيه قرطاسات وقرطاسين ) ولكن تكايسو علينا شوية

على رأي الشاعر القدير الشعيبي والد حمو راه بنادم رونتوه في اختياراتو وعقدتوه في حياتو